Qualcomm va Huawei 5G hamda AI boʻyicha patent shartnomasini imzoladi

Shartnoma har ikki tomonning patent portfellaridan oʻzaro foydalanishni koʻzda tutadi. Bundan tashqari, Qualcomm kompaniyasi Huaweiʼdan hisoblash, AI va maʼlumotlarni uzatish texnologiyalariga oid AQSHda roʻyxatdan oʻtkazilgan muayyan patentlarni sotib oladi. Kompaniyalar oʻrtasidagi kelishuv ilk bor 5G avlodi texnologiyalarini qamrab olmoqda. Shu bilan birga, Qualcomm Xitoy kompaniyasidan LogicFolding texnologiyasini litsenziyalash boʻyicha xabarlarni rad etdi.

Tomonlar ushbu bitimning moliyaviy parametrlarini oshkor qilmadi va hamkorlik intellektual mulk masalalari bilan cheklanishini taʼkidladi. Huawei kompaniyasining intellektual mulk boʻyicha bosh mutaxassisi Alan Fan mazkur bitim kompaniya innovatsiyalarining qiymatini aks ettirishi hamda Qualcommʼning zamonaviy aloqa sohasiga qoʻshgan hissasini eʼtirof etishini qayd etdi.

Imzolangan shartnomani hisobga olgan holda, Huawei kompaniyasining 2011-yildan buyon litsenziyalash boʻyicha shartnomalarining umumiy summasi 6,9 milliard dollardan oshdi. Xitoy kompaniyasi maʼlumotlariga koʻra, 2025-yil oxiriga kelib uning global patent portfeli 165 mingdan ortiq amaldagi patentni tashkil etgan, tuzilgan litsenziyalash shartnomalari soni esa 260 tadan oshgan.