Toyota dunyo boʻylab oʻz zavodlariga 400 mingta robotni joriy qiladi

Nikkei Asia nashrining xabar berishicha, ushbu yangilik global ishlab chiqarishni modernizatsiya qilishning bir qismiga aylanadi. Bevosita Toyota obyektlarida 150 mingta robotni jalb etish rejalashtirilmoqda, yana 250 mingtasi esa guruhning boshqa korxonalari zavodlariga joylashtiriladi.

2028-yildan boshlab kompaniya butun dunyo boʻylab ishlab chiqarish maydonlarini yangilash va qayta jihozlash uchun har yili 1 trln iyen (6 mlrd dollardan ortiq) yoʻnaltirmoqchi.

ELEY (Embodied Learning robot for Enhanced Yield) roboti taxminan 50 kg tosh bosadi, gʻildirakli platformada harakatlanadi, akkumulyator yoki elektr tarmogʻidan ishlaydi hamda ikkita «barmoq»li ikkita qoʻl bilan jihozlangan. Qurilma detallarni ushlab olish va koʻchirish, mato bilan ishlash hamda tirik mutaxassislarning harakatlari asosida harakatlarni oʻrganish qobiliyatiga ega. Maʼlumot yigʻish uchun ishlab chiqarish liniyalaridagi ishchilar qurilma manipulyatorlarini aks ettiruvchi maxsus moslamalarni taqib olishadi.

Toyota ijrochi vitse-prezidenti Hiroki Nakajima avtoishlab chiqaruvchi korxonalarda xodimlarning oʻrnini egallash emas, balki robotlar odamlar bilan hamkorlik qiladigan sharoitlarni yaratishga intilayotganini taʼkidladi.